Poetry | Prose | Poems
My Diary
భాగ్యనగరపు వర్షపు చినుకు
వెతికేనట నీకోసం, తడుతూ
ప్రతి భావనపు తలుపు
కురిసెనట ఏం లాభం,
నగరపు ప్రతి వీధి మొదలు, మలుపు
చాలక తన చూపు,
సాయం కోరేనట చినుకు,
ఇంద్రుని తన మెరుపు.
ఉరుమే తోడై వెలిగెనట
ప్రతి ఇంటి పైకప్పు, వెతుకుతూ
నీ జాడకై, పడమర తూర్పు.
వినిపించలేదా వాటి పిలుపు,
నీ స్పర్శ కోసమేనట వాటి అరుపు
కనిపించమని అడుగుతోంది నిను,
భాగ్య నగరపు వర్షపు చినుకు.
అందించనా నీ జాడ తనకు,
కనికరించవా ఓ సారైనా నా కోరిక మేరకు
విహరిద్దాం వెన్నెలలో ఈ రాత్రి తుది వరకు
స్పృశిద్దాం మనసారా,
ఈ భాగ్య నగరపు వర్షపు చినుకు.
May 15, 2023
కవికి కాగితంతో కాని,
కంటికి ఊహలతో కాని,
ఊహలకి కలలతోకాని,
కలలకి వాస్తవంతోకాని,
ఆకాశానికి మేఘాలతో కాని,
మేఘాలకి నేలతో కాని,
నేలకి నీటితో కానీ,
నీటికి సంద్రంతో కానీ,
సంద్రానికి అలలతో కాని,
నిశికి నక్షత్రాలతో కాని,
చెట్టుకు ఛాయతో కాని,
నిప్పుకు కాంతితో కాని,
మనసుకు మాటలతో కాని,
మాటకు మౌనంతో కాని,
పువ్వుకు పరిమళంతో కాని,
పక్షులకు పలుకులతో కాని,
ప్రేమకు ప్రమాణాలతో కాని,
ప్రాణానికి ప్రహేళికతో కాని,
మలయకు మనోహరంతో కాని,
వానకు వాసనతో కాని,
నదికి నడకతో కాని,
రాయికి శిలలతో కాని,
ఎలాంటి అవసరం లేదు…
కానీ అవి లేకుండా —
ప్రపంచం పూర్తికాదు,
జీవితం పూర్తి అనిపించదు.
october 19, 2018